Izraeli ka njoftuar se Mohammed Odeh, i konsideruar si udhëheqësi i ri i krahut ushtarak të Hamas në Gaza, është vrarë gjatë një sulmi ajror izraelit në qytetin e Gazës.
Sipas raportimeve, Odeh u vra të martën (26 maj) së bashku me bashkëshorten dhe djemtë e tij gjatë bombardimeve izraelite.
Vdekja e tij u konfirmua në një deklaratë zyrtare nga ushtria izraelite, Israel Defense Forces, dhe shërbimi i sigurisë Shin Bet, ndërsa lajmi u raportua edhe nga mediat palestineze të lidhura me Hamasin.
Sipas IDF-së, Mohammed Odeh kishte një rol kyç në planifikimin dhe koordinimin e sulmit të Hamasit të 7 tetorit 2023 ndaj Izraelit dhe më pas kishte drejtuar operacionet ushtarake të organizatës gjatë gjithë luftës në Gaza.
Shërbimet izraelite të sigurisë e cilësuan Odeh si një nga komandantët e fundit të lartë ushtarakë të Hamasit të përfshirë në organizimin e sulmeve të 7 tetorit, duke e konsideruar eliminimin e tij një “goditje të rëndësishme” ndaj përpjekjeve të Hamasit për t’u riorganizuar.
Në një deklaratë të përbashkët, kryeministri Benjamin Netanyahu dhe ministri i Mbrojtjes Israel Katz thanë se Odeh kishte shërbyer si kreu i inteligjencës së Hamasit gjatë sulmeve të 7 tetorit dhe ishte emëruar javën e kaluar për të zëvendësuar Izz al-Din al-Haddad, i cili u vra më 15 maj në një tjetër sulm ajror izraelit në qytetin e Gazës.
Sinjali – aty ku e vërteta flet para lajmit!