Iran ka sinjalizuar gatishmëri për të reduktuar rezervat e uraniumit të pasuruar, në kuadër të negociatave që po zhvillohen me Shtetet e Bashkuara të Amerikës për programin bërthamor.
Sipas raportimeve të mediave ndërkombëtare, një zyrtar i lartë amerikan ka deklaruar se Teherani ka pranuar “në parim” të heqë dorë nga rezervat e uraniumit të pasuruar në nivele të larta, të cilat konsiderohen afër standardeve për prodhimin e armëve bërthamore.
Raportohet se Irani aktualisht zotëron mbi 440 kilogramë uranium të pasuruar deri në 60 për qind pastërti, një nivel shumë më i lartë sesa ai që nevojitet për përdorim civil dhe prodhim energjie.
Burime iraniane kanë bërë të ditur se në fazat e ardhshme të bisedimeve mund të diskutohen opsione konkrete, përfshirë hollimin e uraniumit nën mbikëqyrjen e agjencive ndërkombëtare bërthamore.
Megjithatë, autoritetet iraniane vazhdojnë të mohojnë se programi i tyre synon zhvillimin e armëve bërthamore, duke insistuar se aktivitetet bërthamore të vendit kanë vetëm qëllime paqësore dhe civile.
Negociatat mes palëve pritet të vazhdojnë në ditët në vijim, ndërsa komuniteti ndërkombëtar po ndjek nga afër zhvillimet lidhur me programin bërthamor iranian.
Sinjali – aty ku e vërteta flet para lajmit!