E ardhmja e mbrojtësit të Inter Milan, Denzel Dumfries, mund të marrë një kthesë të rëndësishme pas përfundimit të Kupës së Botës për Klube, kompeticion që konsiderohet si një mundësi ideale për holandezin që të tërheqë vëmendjen e klubeve të mëdha evropiane para afatit kalimtar veror.
Edhe pse lojtari ndihet mirë te skuadra zikaltër dhe nuk ka shprehur pakënaqësi për jetën në Milano, interesimi për të vazhdon të rritet. Arsyeja kryesore lidhet me klauzolën e largimit prej 25 milionë eurosh, e cila hyn në fuqi gjatë muajit korrik dhe mund ta bëjë më të lehtë transferimin e tij.
Sipas raportimeve të “FCInterNews”, një nga ekipet që po e ndjek me vëmendje situatën është Liverpool FC. Klubi anglez raportohet se tashmë ka zhvilluar kontakte me përfaqësuesit e futbollistit për të shprehur interesimin konkret.
Në garë për shërbimet e tij mbetet edhe FC Barcelona, e cila po e sheh Dumfries si alternativë të mundshme nëse vendos të përfitojë financiarisht nga shitja e Jules Koundé. Një operacion i tillë do të kërkonte lëvizje të rëndësishme në merkato, megjithatë drejtuesit katalanas nuk e kanë hequr nga lista emrin e holandezit.
Paraqitjet e Dumfries në ndeshjet e Ligës së Kampionëve ndaj Barcelonës duket se kanë ndikuar pozitivisht në vlerësimin që katalanasit kanë krijuar për të, pasi mbrojtësi la përshtypje shumë të mira në ato përballje.
Sinjali – aty ku e vërteta flet para lajmit!